الثلاثاء، 14 يوليو 2009

إزاى تكسب من الهوا ( 3 ) للشباب فقط

عالم البيزنس مش عالم مثالى ومقتضيات الواقع بتفرض
عليك إنك تقدم بعض التنازلات وساعات بتكون التنازلات
ده هى البيزنس نفسه .
وعشان إحنا واقعيين وعايزين نمدكم بكل الأفكار اللى
بتكسب ( سواء كانت قديمة ومعروفة أو جديدة )
بس صدقونى الافكار دى كلها أفكار مجربة .
الفكرة اللى حطرحها النهاردة للأسف قائمة على
التنازلات وعشان كده ( أصحاب المبادئ يمتنعون )
الفكرة باختصار :
بما إنك شاب وكحروط وبراشوت ومش لاقى اللضا

وعاطل من ذوى الألقاب ومقديها قهاوى وكافيهات
وplay station ومقولتك المأثورة هى :
كتنا نيلة فى حظنا الهباب
وبالرغم من ذلك عندك جانب إيجابى مضئ
وهو إنك شاب وأكيد فاكر شوية إنجليزى من بتوع ثانوى
على شوية كمان حافظهم لزوم المنظرة .
والخطة كتاتى :
( 1 ) دور عن حد من قرايبك أو معارفك يكون شغال فى السياحة
ودول اكتر من الهم على القلب ولو ما تعرفش حد عليك وعلى الاعلانات
المبوبة حتلاقى مائة شركة بتطلب شباب للعمل فى السياحة.
( 2 ) المهم إنك تسافر شرم او الغردقة أو أى مكان فيه اجانب
او حتى تشتغل سيكا فى أى بنسيون يكون نزلائه من الاجانب .
ملحوظة : معنى كلمة سيكا فى المعجم الوجيز : هو شخص بيشتغل
أى حاجة وفى أى حتة على ما تفرج .
( 3 ) انزل وسط الاجانب واحترف القعاد على الكافيهات ( لانها

نقطة انطلاقك فالبيزنس ) وهناك حتقابل سماسرة حيعرضواعليك الجواز
من اجنبية عجوزة وغنية فى مقابل عمولة أو بيزنس مشترك .
بس طبعا ماتدفعش حاجة إلا لما الصفقة تتم .
اما لو كنت واد بورم ومخلص يبقى تتعرف لوحدك وبشكل مباشر وترمى
100هلب على حيزبونة مقرشة ( معاها فلوس ) وده سهل تعرفه من خلال :
( الاماكن اللى بتعد فيها - ملابسها - الحاجات اللى بتشتريها - طريقة تعاملها ...
( 4 ) بعد التعارف بمدة ( خليك تقيل تكسب اكتر ) تبدأ ترسم دور المحب الولهان
واللى هيه مش حتبقى مصدقاه بس حتمشى حالها ( شىء مقابل شىء ) .
( 5 ) واول ما تظبط تبدأ ترمى على الجواز عشان ما بتحبش تغضب ربنا
مع التركيز على حبك العنيف لكرمشة جلدها وشعرها اللى عامل زى الكتانةالبيضا
** بس لازم تسجل عقد الزواج فى السفارة عشان تبقى فى السليم .
( 6 ) وبمجرد إتمام الجواز تبقى كده حققت أجمد بيزنس.لانك:
أولا : لو عندك جيش يبقى غالبا حتطلع منه ( دواعى امنية )
ثانيا : بقيت متجوز وده كان عمره ما حيحصل فى الظروف العادية .
ثالثا : لغتك حتطور بجد وساعتها ممكن تشتغل فى السياحة الحقيقية .
رابعا : فلوس الحيزبونة حتبقى فى جيبك ( بس تحافظ على العلاقة بذكاء )
خامسا : حيبقى معاك passport وبعد فترة حتأخذ الجنسية وتقدر تسافر اى دولة
وأخيرا : صدقونى الفكرة مجربة ومضمونة فى اتنين من صحابى عملوها وعقبال
ما نشفكم زيهم ، وكمان معظم صحاب هانى اللى من القلعة مجوزين اجانب
وأوعى تفتكر إن الحكاية دى حتوقف سوقك مع البنات المصريات بالعكس 60%
من البنات حيقبله يكونوا الزوجة التانية لان ضرتها مش مصرية .
واللى مش مصدق البوست ده يتصل بينا على 0128273875 وأحنا حنعرفه على التفاصيل كاملة
وكمان حنديله عناوين وتليفونات لناس نعرفهم فى شرم والغردقة حيساعدوه .
-------------------------------------------------------------------------
مع تحياتى / حــــازم ربـــيع

تابعوا مدونة روح الفدا

هناك 22 تعليقًا:

عطش الصبار يقول...

اصحاب وبزنس
الحقيقه لازم اعترف ان المدونه بتاعتكم دى فكره جديده
صحيح البوست رعبنى قوى لكن هو بيلقى الضوء على واقع موجود عندنا لكن لى ملحوظه صغيره ما وضحتش برضه الكحروت بعد سنتين من جواز العجوز الاجنبيه هيبقى ايه وبعدين ياعنى ايه كحروت ؟؟؟؟؟؟؟
عجبنى بوست ازاى تبقى مؤلف اغانى شبابيه ضحكت كتير لانها برضه حاجات موجوده صحيح بتثير القرف
لكن انت ممؤلف اغانى شبابيه من الدرجه الاولى ارضيت كل الازواق
سؤال بجد
هو انتم بتهزروا ولابتتكلموا جد
تقبلوا تحياتى
وشكرا على مروركم بجد مدونه متميزه

(Joudy) يقول...
أزال المؤلف هذا التعليق.
(Joudy) يقول...

وكمان سيبين رقم التليفون حقيقى فكرة البزنس بتاع المرة دى مش مضمونة بس حلوة للى يقدر يتنازل


دمتم بكل الخير

micheal يقول...

هههههههههههههههههههه..يا باشا مش عارف ازاي أشكرك ع النصيحة دي
لو جيت المدونة حتعرف أنا ليه البوست ده مخيش معايا أوي
مع تحيات عميد العاطلين في مصر
تحياتي

ايوشة يقول...

ههههه الكلام ده بجد والشباب الكحروت عندنا ماشاء الله بالهبل يلا خليهم يعيشوا شوية وهما بردو لازم يتنازلوا علشان يعيشوا
معنديش اعتراض على البوست دا خالص غير نقطة البنات المصرية هترضى تجوزه بعد كده ولالا معرفش انا كنت اعرف مرة واحدة اتجوزت من واحد كان مجوز اجنبية حيزبونة بعد ما طلقها بس مصدقتش انها رضيت وقولت دى مجنونة اكيد

ريمان يقول...

السلام عليكم


سعيده باضافتك لمدونتى وده طبعا شرف ليا والله


انا كمان ضيفت مدونتك عشان نكون على تواصل

سعيده اوى بمروورى هنا

تحياتى

انسانة يقول...

انا اول مرة ازور مدونتكو
وعجبنى فكرتها جدا وحقيقى قلمك ساخر جدا وخفيف على القارئ
تقبل مرورى
مستنية رد الزيارة

صفــــــاء يقول...

دة رقم مكتب تسفير ؟
مش عارفه
بس أزاى البنى أدم يتعامل كدة
ودى اصلا يقرب لها ازاى ؟
لا يا عم يعيش الفقر يا عيش
ولا العيشه مع واحدة كدة
وقول عليا فقريه ومش وش نعمه براحتك

غير معرف يقول...

طوفى النوفى كمنوفى
وحياة طنت بهيجة؟
أنا عملت الفكرة دى من سنتين بس كانت مصرية و أتجوزت طنت بهيجة . و لما أتجوزتها الحياة بقى لونها طوفى بس الحمد لله ماتت . و كل ثروتها صرفتها على مرضها . وبعت كل هدومى و الاحذية بتاعتى علشان اصرف على دفنتها. شهامة بقى. و من ساعتها حرمت اتجوز خالص.
تحياتى. الزعيم

بحب الحكومة يقول...

ايه يا عم ده ؟؟؟

فى طرق اسهل بكتير

خد طريقة متجربة وادعيلى

1 تضرب شعرك جل وتلبس اللى على الحبل وتصحى الصبح بدرى ( الساعة 11) وتنزل تروح اى وزارة حكومية !!!

2 تدخل بكل احترام وتواضع وتكبر فى نفس الوقت ( ما تسألش ازاى )وتتنحنح وتقول : انا عايز اوصل لسكرتارية الوزير بعد اذنك
وعلى طول تلحقها بجملة : ( همه مش فى الدور الرابع )
كأنك عارف يعنى

هيقولك لأ همه فى الدور .....
تطلع فوق
3 تتصرف فى أى ورقة معفنة وتكتب طلب وظيفة
4 تسلمها وتنزل
5 تروح وتحلم

(Joudy) يقول...

فينكم ايه الغيبة دى يارب تكونوا بخير

تحياتى

دمتم بكل الخير والسعادة

بزنس تعيش يقول...

الى عطش الصبار
---------------

اهم مميزات جيلنا هى القدرة على مواجهة الواقع وتشفير ازماته والتعامل معها حتى بالتنازل يبقى ليه اترعبتى لازم نتعامل مع الواقع


وخلى بالك بعد سنتين الكحروط ها يبقى حاجة جامدة جدا وها يبقى عنده عربية وها يلبس افضل لبس وها يتجوز مصرية مزة



مرسيي ان البوست بتاع الاغانى عجبك والحمد لله ان كلامى عجبك


احنا بنتكلم جد جدا وبننقد الواقع
وبنضحك على مشكلاتنا

كررى الزيارة

-----------------------
مع تحياتى/ حازم ربيع

بزنس تعيش يقول...

joudy
-----


على فكرة الفكرة مضمونة


بس معتمدة على التنازل


وسيبك من دا كله اهم حاجة انك نورتينا


وسمحينا اذا كنا اتاخرنا


لكن البحث على فكرة مش سهل


------------------------
مع تحياتى / حازم ربيع

بزنس تعيش يقول...

الى مايكل
------------


نورتنا


ومدونتك جامدة اخر حاجة



يارب تلاقى فكرة شغل تريحك من الانترفيوهات


هنا فى اصحاب وبزنس


---------------------------
مع تحياتى / حازم ربيع

بزنس تعيش يقول...

ايوشة
-----



مش اتجوزته يبقى كلامنا صح


ربنا يخليكى لينا يا اجمل قارئة

-------------------------------
مع تحياتى / حازم ربيع

بزنس تعيش يقول...

ريمان
-----


انتى طاقة ومتميزة بجد



فلا شكر على واجب


تابعينا

----------------
مع تحياتى/ حازم ربيع

بزنس تعيش يقول...

الى انسانة
-------------

مرورك لينا شرف كبير


ويارب التواصل يدوم


----------------------
مع تحياتى/ حازم ربيع

بزنس تعيش يقول...

صفاء
-----


ما تنسيش اننا قولنا اصحاب المبادئ يمتنعون


وعموما رأيك فوق دماغنا من فوق


--------------------------------
مع تحياتى / حازم ربيع

بزنس تعيش يقول...

الى زعيم
---------


رائع


اهم شئ الاحترام يا زعيم


الله يرحم طنط بهيجة


كانت ست


ست قرون من الزمان كويس انها قعدت معاك شوية


اهو تكفير ذنوب


خش على الاجنبية وطور حياتك


واسترجل

----------------------------
مع تحياتى/ حازم ربيع

بزنس تعيش يقول...

الى بحب الحكومة
-----------------



حرااااااااااااااااااااااام



يا عم خلينا متمسكين بالامل


وربنا كريم



----------------------------

مع تحياتى / حازم ربيع

بزنس تعيش يقول...

جودى
------


احنا رجعنا


انتى اللى فين

لاسع افندى يقول...

هههههههههه
تحذير للشباب
السوق اليومين دول مضروب واغلبهم روسيات بيدوروا على الجنسيه المصريه
هههههههههههه



تحياتى اللاسعه