اغنية دور بنفسك لاحمد مكى درس فى البيزنس للى يفهم

تاج مهم وصلنى من جودى صاحبة مدونة كلام من دهب

ووصلنى تاج من المدونة العزيزة جودى صاحبة مدونة كلام من دهب


به سؤال واحد هو:



ما هى اكثر عشر اشياء صادقة بحياتك؟

واليكم الاجابة:


1 ) امى هى اصدق شئ فى حياتى ضحت لاجلى كثيرا ولازالت وانا لولاها ما
ماكنت شئ.
2 ) حبى لمهنتى وعملى بالتدريس من اصدق الاشياء فى حياتى واحس ان هذا
المجال هوالبحر الذى اذا خرجت منه اموت .
3) الايمان بالله ثم الايمان بالعلم ثم الايمان بالاسباب التى تؤدى الى نتائج الخير.
4) رغبتى فى التميز فى عالم التدوين كاعلام بديل بعد ان غلقت الابواب امام
اقلامنا بلا سبب ونفع الناس بما نقدمه وتبادل المعلومات والافكار.
5) الدعاء للمولى عز وجل ، هواحد اهم اصدق الاشياء فى حياتى ، فكم لجئت له
وكم طرقت بابه ، وكم تصورت ان الابواب غلقت ، فاذا الفرج والعون والرحمة
تأتى منه عز وجل ، ومن زاوية غير زاوية سعيي واسبابى ، دلالة على الوهيته
ورحمته واجابته لدعاء عبيده الفقراء .
6) ما اكتبه شعرا هو من اصدق الاشياء فى حياتى لانى لا اكتب الا من خلال تجاربى
وتجارب المحيطين.
7 ) دمعتى صادقة لا تخرج الا عندما تعجز عينى عن ايقافها.
8) احلامى من اكثر الاشياء الصادقة فى حياتى ، لانى بفضل الله احققها حتى وان طال
الزمن.
9)عشقى وحبى لابناء اخوتى اروى ، و سما ، و مازن ، وحلا .
10) تقديرى لأهم مثل اعلى لى فى الدنيا بعد رسول الله ، وهو خالى / حسن السروجى
الرجل الذى من الله عليه بادب جم ، ومراعاة لحدود الله فى كل صغيرة وكبيرة .
--------------------------------------------------------------
-----------------------------------------------------

يااااااااااا التاج خلص مش معقول

انا كنت فاكره سؤال سهل طلع صعب وصعب قووووى
كل الشكر لجودى على تمريرها التاج ده ليا
لانه خلانى اعيد حساباتى وافكر فى حاجات كتيرة
وبامرر التاج لكل الناس اللى مضافة عندى فى المدونة عندى
وكل سنة وحضراتكم طيبين
----------------------------------------------------
مع تحباتى / حازم ربيع

ازاى تكسب من الهوا (5) صناعة الافكار

من اهم انواع البيزنس


بيزنس الافكار


لان صناعة الافكار صناعة رائجة فى هذا العصر الاعلامى

النهاردة ها اسيبكم تقروا البوست


فى مدونة صديقة هى مدونة


يا سلام لمحمد السروجى


http://mamato2010.blogspot.com/

ازاى تكسب من الهوا (4) بزنس لكل الناس

عشان تعمل بزنس وتكسب منه لازم تعرف السوق

المستهدفه كويس

لان معرفتك للسوق المستهدفة وعقلية العميل

بتساعدك كتير فى النجاح

وباختصار عقلية المواطن المصرى لها قالب ثابت

ومقدسات ثابتة لا تتغير

الاكل والشرب وتعليم العيال وتجهيز البنت للجواز

احنا النهاردة هنلعب على احتياج تجهيز البنات للجواز

-----------------------------------

بص ياسيدى ويا ستى وما سيدكم الا انا

انت وهى تروحوا على سوق عزة تبضعوا عبايات

على قمصان نوم

وبجامات عروسة وشباشب على شكل دباديب

بس لازم تكون بتفاصل كويس

علشان ماتدبسشى يعنى البياع يقولك 100 تقوله 20

واول ما تشترى الحاجة تروح تتفق مع الست الوالدة

انها توريهم للجيران

والاقارب وتقول محمد صاحب ابنى بيجيب حاجات بالتقسيط

تحفة

اوعى تقول ان انت اللى بتبيع فى الاول لان هايبقى فيه عشم

وانت عارف عم عشم مات

وها ينزلوا سعر الحاجة الارض وخليك بياع نقاوة ما بتفاصلش

ساعتها هتلاقى مليون طلب يا معلم

اللى هتقولك عنده روج تقول انت موجود

واللى تقولك عنده لانجرى بردوا موجود

بيع بالقسط وعلى السعر وكون رخم فى اخد فلوسك فى ميعادها

واستخدم الوسطاء اللى تجيبلك صاحبته

ا اعملها تخفيض او اديها حاجة زيادة

خلى لسانك حلو الستات بتشترى من ابو لسان حلو

حتى لو سعره غالى

وكون على استعداد للاستماع الى الرغى

وتفاصيل التفاصيل

الستات عندهم تردد دائم

وبيحبوا يتاكدوا انهم ما اضحكش عليهم

وبكده ها تبزنش وتعيش يا معلم

ويا معلمة كمان

---=---=---=---=----

مع تحيات صاحب افكار البزنس العالمى

حازم ربيع

إزاى تكسب من الهوا ( 3 ) للشباب فقط

عالم البيزنس مش عالم مثالى ومقتضيات الواقع بتفرض
عليك إنك تقدم بعض التنازلات وساعات بتكون التنازلات
ده هى البيزنس نفسه .
وعشان إحنا واقعيين وعايزين نمدكم بكل الأفكار اللى
بتكسب ( سواء كانت قديمة ومعروفة أو جديدة )
بس صدقونى الافكار دى كلها أفكار مجربة .
الفكرة اللى حطرحها النهاردة للأسف قائمة على
التنازلات وعشان كده ( أصحاب المبادئ يمتنعون )
الفكرة باختصار :
بما إنك شاب وكحروط وبراشوت ومش لاقى اللضا
وعاطل من ذوى الألقاب ومقديها قهاوى وكافيهات
وplay station ومقولتك المأثورة هى :
كتنا نيلة فى حظنا الهباب
وبالرغم من ذلك عندك جانب إيجابى مضئ
وهو إنك شاب وأكيد فاكر شوية إنجليزى من بتوع ثانوى
على شوية كمان حافظهم لزوم المنظرة .
والخطة كتاتى :
( 1 ) دور عن حد من قرايبك أو معارفك يكون شغال فى السياحة
ودول اكتر من الهم على القلب ولو ما تعرفش حد عليك وعلى الاعلانات
المبوبة حتلاقى مائة شركة بتطلب شباب للعمل فى السياحة.
( 2 ) المهم إنك تسافر شرم او الغردقة أو أى مكان فيه اجانب
او حتى تشتغل سيكا فى أى بنسيون يكون نزلائه من الاجانب .
ملحوظة : معنى كلمة سيكا فى المعجم الوجيز : هو شخص بيشتغل
أى حاجة وفى أى حتة على ما تفرج .
( 3 ) انزل وسط الاجانب واحترف القعاد على الكافيهات ( لانها
نقطة انطلاقك فالبيزنس ) وهناك حتقابل سماسرة حيعرضواعليك الجواز
من اجنبية عجوزة وغنية فى مقابل عمولة أو بيزنس مشترك .
بس طبعا ماتدفعش حاجة إلا لما الصفقة تتم .
اما لو كنت واد بورم ومخلص يبقى تتعرف لوحدك وبشكل مباشر وترمى
100هلب على حيزبونة مقرشة ( معاها فلوس ) وده سهل تعرفه من خلال :
( الاماكن اللى بتعد فيها - ملابسها - الحاجات اللى بتشتريها - طريقة تعاملها ...
( 4 ) بعد التعارف بمدة ( خليك تقيل تكسب اكتر ) تبدأ ترسم دور المحب الولهان
واللى هيه مش حتبقى مصدقاه بس حتمشى حالها ( شىء مقابل شىء ) .
( 5 ) واول ما تظبط تبدأ ترمى على الجواز عشان ما بتحبش تغضب ربنا
مع التركيز على حبك العنيف لكرمشة جلدها وشعرها اللى عامل زى الكتانةالبيضا
** بس لازم تسجل عقد الزواج فى السفارة عشان تبقى فى السليم .
( 6 ) وبمجرد إتمام الجواز تبقى كده حققت أجمد بيزنس.لانك:
أولا : لو عندك جيش يبقى غالبا حتطلع منه ( دواعى امنية )
ثانيا : بقيت متجوز وده كان عمره ما حيحصل فى الظروف العادية .
ثالثا : لغتك حتطور بجد وساعتها ممكن تشتغل فى السياحة الحقيقية .
رابعا : فلوس الحيزبونة حتبقى فى جيبك ( بس تحافظ على العلاقة بذكاء )
خامسا : حيبقى معاك passport وبعد فترة حتأخذ الجنسية وتقدر تسافر اى دولة
وأخيرا : صدقونى الفكرة مجربة ومضمونة فى اتنين من صحابى عملوها وعقبال
ما نشفكم زيهم ، وكمان معظم صحاب هانى اللى من القلعة مجوزين اجانب
وأوعى تفتكر إن الحكاية دى حتوقف سوقك مع البنات المصريات بالعكس 60%
من البنات حيقبله يكونوا الزوجة التانية لان ضرتها مش مصرية .
واللى مش مصدق البوست ده يتصل بينا على 0128273875 وأحنا حنعرفه على التفاصيل كاملة
وكمان حنديله عناوين وتليفونات لناس نعرفهم فى شرم والغردقة حيساعدوه .
-------------------------------------------------------------------------
مع تحياتى / حــــازم ربـــيع
تابعوا مدونة روح الفدا

توضيح لابد منه

هاى يا قراء المدونة الكرام
قبل ما ابدء فى كتابة البوست الجديد لازم انوه عن حاجة مهمة
لان فى ناس علقت على البوست القديم وقالت ان الفكرة قديمة
احنا فى المدونة دى عايزين نعطيك افكار تلهمك حتى لو كانت
فى ناس عملتها قبلك. لانك ليك دور فى الفكرة تطورها وتطوعها
وتوضع فيها بصمتك عشان توجد نجاحك الشخصى . وفى الاخر احنا بنجتهد اننا
ننفع باسلوب بيسط بعيد عن التعقيد والحزلقة والفزلكة الفارغة وصدقونى الافكار دى
احنا عملنا بعضها ونجحنا واصحابنا عملوا حاجات منها ونجحوا

المهم انك تبذل الجهد وربنا مش بيضيع اجر حد
الانسان النجاح هو اللى بياخد عصارة تجارب الاخرين ويبدأ من حيث انتهوا

لان الافكار مثل الطعام ان تركتها تعفنت

الحق فكرتك وامسك بايدك فرصتك
عشان ما تنجح لابد تمشي فى سكتك
------------------------------------------
مع تحياتنا / حازم ربيع و هانى عمر

إزاى تكسب من الهوا ( 2 ) ... ( بيزنس )

كتير من اللى قروا البوست اللى فات افتكرونا بنهزر
بس الحقيقة إن أحنا بنكتب الحقيقة بشكل فكاهى
وأنتم لو اتبعتم الخطوات اللى بنقولها فى سلسلة
( إزاى تكسب من الهوا ) .. حتبقوا على موعد
مع المكسب بجد .
النهارده حقول لكم طريقة جديدة للمكسب من الهوا :
وهى ( الاستثمار العقارى )
كلنا كشباب عايزين نشترى شقق عشان نتجوز
وطبعا عدد المصريين فى الليمون .
وعشان كده بندور على أى أربعة حيطان ولو فى الواق الواق
او فى البحيرات الوسطى فى مجاهل افريقيا .
وعشان تبزنس دور على اى أرض فى صحراء مصر اللامتناهية
حتلاقيها بملاليم ، اشترى مساحة كبيرة ( ولو مش معاك فلوس )
اشترك إنت وشوية من صحابك المريشين .
خد بضمان الارض قرض محترم ، وابدأ اعلن فى الوسيط
وفى الاهرام واعمل شوية ملصقات ، وخلى واحد بتاع جرافيك
يرسمللك قرية كبيرة أو تجمع سكنى كبير .
خد باللك اهم حاجة فى الليلة الــتــسويـــق الجــــيد
( ملحوظة ) : حط فلوس القرض فى بنك تانى عشان تدور
وتشتغل يا معلم ، واجر مكتب وهات فريق من أصحابك
يقوموا بخدمة العملاء ، واعمل نظام تقسيط مرتاح
وحط كمان فلوس العملاء فى البنك ، ومن أرباح فلوس العملاء
أبدأ اشتغل تاتا تاتا ، وساعتها حتكسب وتبقى من اكابر المستثمرين
وكل التكلفة منحصرة فى تمن الارض اللى فى الاصل بملاليم
وكده حتبقى رجل اعمال كبير يا معلم وابقى تعالى اعلن عندنا فى المدونة
وما تنساناش فى شقتين .
وحتى لو المشروع فشل حول فلوسك لسويسرا وكت يا man
وعيـــــش فى الروقـــــــــــان
مع تحياتى / حازم ربيع

إزاى تكسب من الهوا ( 1 )

* لو كنت شاب وضربك السلك ... زى معظمنا وعايز
تبزنس والعيشة ترتاح من غير وجع قلب ولف على
الشركات ورمى سيفيهات وعصر فى انترفيوهات ....
* ممكن تحقق كل ده ببساطة وعندك 3 طرق مشهورة
- أما تبقى لاعب كرة أو تبقى ممثل أو تغنى .
- بس طبعا الطريق مش سهل وفيه شوية عقبات وحفر :
( 1 ) ممكن يكون سنك كبير وطبعا مافيش نادى محترم
حيضمك ليه أو ما عندكش واسطة كويسة تظبطلك الأمور .
( 2 ) ممكن يكون عندك سأسأة وتأتأة ووشك يقطع أحلى
خميرة من أجدعها بيت وبرضه ما عندكش واسطة
( 3 ) أو ممكن يكون صوتك زى الرعد وشبه صوت
( يوسف داود ) وحتى لو صوتك بيقول أكيد مـــــــش
حتلاقى شركة تنتج لك ألبوم وبرضه ما عندكش واسطة .
** بس ما تخافش يا معلم الحل عندنا .. ومش محتاج
غير شوية صحصحة وشطارة ومش محتاج أى واسطة
- الحكاية ببساطة أنك تشغل صياعتك وتقعد مع شوية
من الصيع صحابك على قهوة تكون هادية وتدور فى
دماغك على كام إفيه ( يعنى كام جملة فيهم سجع وقفشة تضحك )
وتلزقهم فى بعض وتطلع فى الآخر بأغنية ...
حيرد واحد فزلوك ويقوللى : طب ما برضه لسه
محتاج شركة إنتاج عشان الاغنية تتعمل  ولا هى
الأغنية كلام وبس ......
* حرد عليه وأنا قرفان ومخنوق واقوله :
بسيطة مش إنت كتبت الأغنية خش على أى
برنامج موسيقى ع الكمبيوتر واسرق كام جملة
لحنية جاهزة واعمل ليهم مكس يطلعلك لحن للاغنية
- وعشان تنفذها برضه بسيطة ...برامج المونتاج
كتيرة ومغرقة النت وبعد كده شير الأغنية يا معلم
على يو تووب أو أى برنامج تانى .
( لو محتاج تعرف إزاى تشير ابعت واحنا نقولك )
- بس لازم تسيط للأغنية وسط صحابك وكمان
لازم تبعتها على البلوتوث لأى نمرة وما تنساش تديها لكل سواق ميكروباص تركب معاه .
* وبكده يا معلم حتبقى ( مؤلف وملحن ومطرب )
وشركات الانتاج هيه اللى حتجرى وراك لانك ببساطة
حتكون النجم الأول لسواقين الميكروباص والتوك توك
** وإليك بعض النماذج المقترحة لبعض الاغنيات
 واللى ممكن تعمل زيها :
       ( نموذج 1 )
دمرتينى ...... وكسرتينى
وشردتينى ف وسط السوق
كنت آداب حولت حقوق
كنت أنا موز وبقيت برقوق
كنت أنا فاكرك ليا لوحدى
أتاريكى مع كل شروق
كل الناس منك بتدوق
-------------------
ودا نموذج حزينى قسم ميكروباصات
--------------------------
( نموذج 2 )
أنت شقية .. شقية .. شقية
يا رايحة الكلية
حبك قادر .. قادر .. قادر
وعيونك لعبية
******** 
يا حاضنة الكشكول
قلبى بيكى مشغول
لو ترضى بس يا حلوة
نتجوز على طول
******** 
مش حارسم ولا امثل
ولا اجبلك دبدوب
ولا انتخ ولا اكسل
واعملك شيبوب
من شبرا أنا معسل
وبحبك وبادوب 
وافقى بس يا حلوة
وأنا اجيب المطلوب
-------------------------
دا نموذج افيه وهايعجب بنات الجامعة أوى يا معلم
--------------------------------------------
( نموذج 3 )
لو حزنك حيحكك .. فكك
وانسى الجرح وعيش
وحبيبك لو نفض
خفض سعره وما تقوليش
وإن شافك لمحك .. بحلق
واعمل فيها شيش بيش
وإن نادى واتمادى
سد ف وشه الشيش
------------------
دا نموذج لاغنية افية صايعة بتستخدم كلمات الشباب
-----------------------------------
بس لازم تخلى بالك من النصايح ده :
( 1 ) لابد من ذكر اسماء بعض المناطق الشعبية
فى كلمات الاغنية
( 2 ) لازم صوتك يبقى فيه بحة وسرسعة
و يا سلام لو كان عندك خنفة تبقى فلة
وحتبقى شبيه ( إيـــهـــاب تــوفــيــق )
( 4 ) ضرورة ذكر بعض أنواع من الفاكهة
( بس بلاش العنب والبلح ) خلاص اتحرقوا فى السوق
ممكن تركز ع البرقوق أو الخوخ .
( 5 ) ما تنساش تحط جنب عنوان الاغنية صورتك
وإنت شعرك منكوش وبتبص للسما ومتنح وماسك جيتار
( 6 ) ركز على اللون الشعبى بلاش العاطفى
ده اللى بياكل مع سواقين الميكروباص
والتوك توك ( هما دول الفئة المستهدفة )
وبكده يا معلم حتبزنس وتحقق الشهرة والنجومية
بس ما تنساناش ............ يا نجم
ولو حد فاكر إن الكلام استظراف وبواخة
اقول له جرب الأول قبل ما تغلط ....
----------------------------------------------
مع تحياتنا / حــــــازم وهـــانـــى
--------------------------------------------
ملحوظة : كلمات الاغانى من تأليف حازم ربيع

مدونة هادفة للربح

فى الاول بنرمى السلام على قارئ المدونة الكرام
* تحقيقا لمبدأ البزنس جعلنا مدونتنا مدونة هادفة للربح .
* وذلك عن طريق الاستفادة من الاعلانات خاصة إعلانات جوجل
.
* وكمان حنستثمر التدريس وحندى دروس خصوصية فى المدونة ( أى حد له حد عزيز عليه فى الثانوية العامة
خليه يعدى علينا أو أى حد عايز يتعلم إنجليزى أوإيطالى ) يكلمنى على موبايل رقم ( 00000000000) وحرد عليه بنفسى وحنتكلم فى كل حاجة هيــــــــــه إنسى ...طريق النجاح صعب جدا ..بس سهل جدا ...مش عارف إزاى
** لو عايز تبقى ( جان وواد حلو وفتان) إعمل عندنا إعلان .
** لو كنتى عانس وعايزة عريس.... عندنا من أول الظابط لحد سواق أتوبيس .
** لو عاوز أى وظيفة وحياتك صعبة مخيفة حنجبلك شغلة ظريفة .
** لو كنت واد حبيب .... وغاوى شرا دباديب .....بنبيع هدايا تصيب ( بتنين ونص )

**** إيدى فى إيدك ...الخير حيجينى ويجيلك ****

--------------------------------------------------------------
مع تحياتنا / حازم وهانى

افتتاحية

قررت أنا حازم ربيع وصديقه هانى عمر أن نكون أصحاب
وأن نربط هذه الصداقة بنجاحات فى عالم البزنس ( أى مصلحة والسلام )
م الآخر إحنا أصحاب وبزنس
مقتنعين تماما بمقولة حسن الهلالى فى فيلم ( أمير الانتقام ) :
" بارك الله فى التجارة القائمة على الصداقة ، أكثر من الصداقة القائمة على التجارة "
ونحب نعرفكم بينا وكمان نتعرف عليكم ، إحنا بعبارة بسيطة " أصدقاء فى مهنة الوجع "
وهى مهنة التدريس .
------------------------------------------------
- حازم
* شاب عنده 27 سنة
* مدرس للغتين ( إنجليزية وإيطالية ) فى أحد معاهد اللغات المرموقة
* له هوايات كتير ومشاريع أكتر .
* مذيع على النت
* مخرج مسرحى .
* وشاعر بيعد لديوانه الأول .
* ومدرب تنمية بشرية ومهارات اتصال ومدرب مبيعات وتسويق .
---------------------------------------------
- هانى
* شااب عنده 33 سنة .
* مدرس لغة عربية فى نفس المعهد بتاع حازم .
* عنده هوايات كتير وطموحات أكتر .
* كاتب سيناريو وقصاص .
* شاعر بحاجات كتير إيه هيه مش عارف .
* تاجر خسر كتير فى تجارته ؛ لكن مصر على تحقيق حلمه .
--------------------------------------------
** اجتمعنا على الحلم وبقينا أصحاب وبزنس ، ومش حنخلى الحلم ده لينا لوحدنا
كل قراء المدونة هم أصحاب لينا ومشاركين لينا فى شراكة البزنس .
ومستنيين منهم مشاركتهم بكل افكارهم عن الصحوبية وعن البزنس
*** ونـــتـمنــى إن المــدونـــة تـــقـــدم لـــكــم حـاجــات مـفيـــــدة

مع تحياتنا / حــــازم وهــــانى