الخميس، 25 يونيو 2009

إزاى تكسب من الهوا ( 1 )

* لو كنت شاب وضربك السلك ... زى معظمنا وعايز
تبزنس والعيشة ترتاح من غير وجع قلب ولف على
الشركات ورمى سيفيهات وعصر فى انترفيوهات ....

* ممكن تحقق كل ده ببساطة وعندك 3 طرق مشهورة
- أما تبقى لاعب كرة أو تبقى ممثل أو تغنى .
- بس طبعا الطريق مش سهل وفيه شوية عقبات وحفر :
( 1 ) ممكن يكون سنك كبير وطبعا مافيش نادى محترم
حيضمك ليه أو ما عندكش واسطة كويسة تظبطلك الأمور .
( 2 ) ممكن يكون عندك سأسأة وتأتأة ووشك يقطع أحلى
خميرة من أجدعها بيت وبرضه ما عندكش واسطة
( 3 ) أو ممكن يكون صوتك زى الرعد وشبه صوت
( يوسف داود ) وحتى لو صوتك بيقول أكيد مـــــــش
حتلاقى شركة تنتج لك ألبوم وبرضه ما عندكش واسطة .
** بس ما تخافش يا معلم الحل عندنا .. ومش محتاج
غير شوية صحصحة وشطارة ومش محتاج أى واسطة
- الحكاية ببساطة أنك تشغل صياعتك وتقعد مع شوية
من الصيع صحابك على قهوة تكون هادية وتدور فى
دماغك على كام إفيه ( يعنى كام جملة فيهم سجع وقفشة تضحك )
وتلزقهم فى بعض وتطلع فى الآخر بأغنية ...
حيرد واحد فزلوك ويقوللى : طب ما برضه لسه
محتاج شركة إنتاج عشان الاغنية تتعمل  ولا هى
الأغنية كلام وبس ......
* حرد عليه وأنا قرفان ومخنوق واقوله :
بسيطة مش إنت كتبت الأغنية خش على أى
برنامج موسيقى ع الكمبيوتر واسرق كام جملة
لحنية جاهزة واعمل ليهم مكس يطلعلك لحن للاغنية
- وعشان تنفذها برضه بسيطة ...برامج المونتاج
كتيرة ومغرقة النت وبعد كده شير الأغنية يا معلم
على يو تووب أو أى برنامج تانى .
( لو محتاج تعرف إزاى تشير ابعت واحنا نقولك )
- بس لازم تسيط للأغنية وسط صحابك وكمان
لازم تبعتها على البلوتوث لأى نمرة وما تنساش تديها لكل سواق ميكروباص تركب معاه .
* وبكده يا معلم حتبقى ( مؤلف وملحن ومطرب )
وشركات الانتاج هيه اللى حتجرى وراك لانك ببساطة
حتكون النجم الأول لسواقين الميكروباص والتوك توك
** وإليك بعض النماذج المقترحة لبعض الاغنيات
 واللى ممكن تعمل زيها :
       ( نموذج 1 )
دمرتينى ...... وكسرتينى
وشردتينى ف وسط السوق
كنت آداب حولت حقوق
كنت أنا موز وبقيت برقوق
كنت أنا فاكرك ليا لوحدى
أتاريكى مع كل شروق
كل الناس منك بتدوق

-------------------
ودا نموذج حزينى قسم ميكروباصات
--------------------------
( نموذج 2 )
أنت شقية .. شقية .. شقية
يا رايحة الكلية
حبك قادر .. قادر .. قادر
وعيونك لعبية

******** 
يا حاضنة الكشكول
قلبى بيكى مشغول
لو ترضى بس يا حلوة
نتجوز على طول

******** 
مش حارسم ولا امثل
ولا اجبلك دبدوب
ولا انتخ ولا اكسل
واعملك شيبوب
من شبرا أنا معسل
وبحبك وبادوب
 
وافقى بس يا حلوة
وأنا اجيب المطلوب

-------------------------
دا نموذج افيه وهايعجب بنات الجامعة أوى يا معلم
--------------------------------------------
( نموذج 3 )
لو حزنك حيحكك .. فكك
وانسى الجرح وعيش
وحبيبك لو نفض
خفض سعره وما تقوليش
وإن شافك لمحك .. بحلق
واعمل فيها شيش بيش
وإن نادى واتمادى
سد ف وشه الشيش

------------------
دا نموذج لاغنية افية صايعة بتستخدم كلمات الشباب
-----------------------------------
بس لازم تخلى بالك من النصايح ده :
( 1 ) لابد من ذكر اسماء بعض المناطق الشعبية
فى كلمات الاغنية
( 2 ) لازم صوتك يبقى فيه بحة وسرسعة
و يا سلام لو كان عندك خنفة تبقى فلة
وحتبقى شبيه ( إيـــهـــاب تــوفــيــق )
( 4 ) ضرورة ذكر بعض أنواع من الفاكهة
( بس بلاش العنب والبلح ) خلاص اتحرقوا فى السوق
ممكن تركز ع البرقوق أو الخوخ .
( 5 ) ما تنساش تحط جنب عنوان الاغنية صورتك
وإنت شعرك منكوش وبتبص للسما ومتنح وماسك جيتار
( 6 ) ركز على اللون الشعبى بلاش العاطفى
ده اللى بياكل مع سواقين الميكروباص
والتوك توك ( هما دول الفئة المستهدفة )
وبكده يا معلم حتبزنس وتحقق الشهرة والنجومية
بس ما تنساناش ............ يا نجم
ولو حد فاكر إن الكلام استظراف وبواخة
اقول له جرب الأول قبل ما تغلط ....
----------------------------------------------
مع تحياتنا / حــــــازم وهـــانـــى
--------------------------------------------
ملحوظة : كلمات الاغانى من تأليف حازم ربيع

هناك 17 تعليقًا:

ديالا يقول...

يانهار ابيض لا فنان فنان يانجم ايه الاغاني الهايله دي

طب ماتلحنهم وتغنيهم وانا هوزعهم علي كل صحباتي وسيبك من شغله التدريس دي

والله مش بقت جايبه همها

مستنين شريطك قريبا في الاسواق

ديالا يقول...

ايه ده انا اول تعليق

طب احب احجز اتاني تعليق كمان

ديالا يقول...

ومعلش لو فيها رخامه شويه تالت تعليق كمان

ديالا يقول...

وعشان بحب رقم 4 خليني رابع تعليق

ديالا يقول...

وعشان الحسد يبقي5

خامس تعليق كمان

marwa يقول...

أولا بتمنى لكم التوفيق وانكم تحققوا كل اللي بتتمنوه سواء في المدونه أو خارجها

لكن بلاش حكاية أغاني التوك توك والميكروباص احنا دماغنا وجعتنا
يعني مفيش بيزينس غير كده ؟؟!!

بس اللي ألف الأغاني بيدل انه ممكن يطلع منه حاجات حلوة كتير

تقبلوا مروري وتحياتي

جارة القمر يقول...

ههههههههههههههههههههههه

أغاني تحفة


ربنا يوفقكم يارب


وبكرة البلية تلعب معك


حلو البوست يسلموووووووووو

اسماء واحلام فى وجدانى يقول...

على فكرة انا قابلت التجربة دى قبل كده مع ناس صحابى اتنين مقاطيع زى حالاتى الفه اغنية بس هما قاموا بالحانها وغنوها مش عارف ازاى
فى البداية جانى واحد منهم وقالى سمعت الدويتو الجديد فلان وفلان قلتله مين دول ياعم الحاج قالى بس اسمع لاقيت الكلام حلو واللحن احلى وفى الاخر قالى انى والاخ التانى اللى عملنا كده بينى وبينك انا ما صدقت لانهم عارفهم كويس بيبعوا المية فى حارة الساقين
بس انا شوفتهم بعنيا الاتنين اللى شايفكم بيهم دلوقتى
بس طبعا كانوا محتاجين اد فدان كوسة علشان يقدرا يوصلوا
بس للاسف الفدان طلع فدان بطيخ ولغاية دلوقتى بناكل منه كلنا

كان معكم واحد من المقاطيع

اسماء واحلام فى وجدانى يقول...

ديالا

هو الاحتلال ده فى كل مكان

الرحمة يا بنتى

(Joudy) يقول...

هههههههههههههه

لا حقيقى دمها خفيف وتقريبا والله أعلم هو ده اللى بيمشى مع الناس بس بينى وبينكم أنا أول ما أسمع أغنيه منهم هاخد الطريق جرى لحد البيت ومش هركب لا ميكروباص ولا حتى توك توك مع انى كان نفسى أجربه هههههههههه

يالا هعمل ايه نصيبنا كده وربنا يوفقكم

دمتم بكل الخير والسعادة.

MaNoOoSh يقول...

لا بجد بجد
الاغاني حلووووووووووووة جدا

بس بلاش المكروباااااااااااااااااااااظ
بيجيلي حساسية منه
عاااااااااااا

بزنس تعيش يقول...

الى ديالا
-*-*-*-*-*-
خمس تعليقات وخميسة
يا ديالا
انا فعلا باكتب كلمات
بس باستغل الموهبة فى الشغل
انا باعمل كلمات الاعلانات
وخصوصا فى اف ام
لكن لازم يكون فى مهنة اساسية
وانا باعشق التدريس
------------------------
مع تحياتى / حازم ربيع

بزنس تعيش يقول...

الى مروة
-*-*-*-*-
مرسيي على المجاملة
وانك قلتى انى كلماتى
تنفع يطلع منها حاجات حلوة
-----------------------------
احنا عاملين البوست عشان الشباب
يكسب مش مهم بقى توك توك ولا ميكروباص
فى عالم البزنس
اللى تغلبه العب به
----------------------------
مع تحياتى / حازم ربيع

بزنس تعيش يقول...

جارة القمر
-*-*-*-*-*-
احنا مش عايزين البلية تلعب
احنا عايزين حسابنا فى البنك يكبر
وعلى فكرة لو صوتك زى فيروز
انا ممكن اكتب لك كلام جامد
--------------------
مع تحياتى / حازم ربيع

بزنس تعيش يقول...

الى اسماء واحلام فى وجدانى
-*-*-*-*-*-*-*-*-*-*-
برافو
برافو
برافو
بس واضح انكم ما ركزتوش كويس
فى التسويق للاغنية
ابعت الاغنية وانا اسوقها لك
بس ليا نسبتى
-------------------------------
مع تحياتنا / حازم وهانى

بزنس تعيش يقول...

جودى
-*-*-*-
فى علم المبيعات
فى حاجة اسمها السوق المستهدفة والعميل المستهدف
انتى مش من سوق الميكروباص
بس فى غيرك من السوق دا
------------------------
احنا عاوزين الناس تتشهر
وتكسب وبعدين
تعمل الكويس
خالد عجاج مثلا
بدا فى الميكروباص ب
شكا حكا بكى شكا
ولما اشتهر قدم
اصعب حب
والست دى امى
---------------------------
مع تحياتنا / حازم وهانى

بزنس تعيش يقول...

الى منوش
-*-*-*-*-
ياجدعان الميكروباص بداية ثم كلنا بنركبه ولازم نسمع الاغانى غصب واقتدار يعنى ضمان للشهرة
والحاجات المفرقعة بتعلق معانا
-------------------------------
مع تحياتنا / حازم و هانى