الخميس، 2 يوليو 2009

إزاى تكسب من الهوا ( 2 ) ... ( بيزنس )

كتير من اللى قروا البوست اللى فات افتكرونا بنهزر
بس الحقيقة إن أحنا بنكتب الحقيقة بشكل فكاهى
وأنتم لو اتبعتم الخطوات اللى بنقولها فى سلسلة
( إزاى تكسب من الهوا ) .. حتبقوا على موعد
مع المكسب بجد .
النهارده حقول لكم طريقة جديدة للمكسب من الهوا :
وهى ( الاستثمار العقارى )
كلنا كشباب عايزين نشترى شقق عشان نتجوز
وطبعا عدد المصريين فى الليمون .
وعشان كده بندور على أى أربعة حيطان ولو فى الواق الواق
او فى البحيرات الوسطى فى مجاهل افريقيا .
وعشان تبزنس دور على اى أرض فى صحراء مصر اللامتناهية
حتلاقيها بملاليم ، اشترى مساحة كبيرة ( ولو مش معاك فلوس )
اشترك إنت وشوية من صحابك المريشين .
خد بضمان الارض قرض محترم ، وابدأ اعلن فى الوسيط
وفى الاهرام واعمل شوية ملصقات ، وخلى واحد بتاع جرافيك
يرسمللك قرية كبيرة أو تجمع سكنى كبير .
خد باللك اهم حاجة فى الليلة الــتــسويـــق الجــــيد
( ملحوظة ) : حط فلوس القرض فى بنك تانى عشان تدور
وتشتغل يا معلم ، واجر مكتب وهات فريق من أصحابك
يقوموا بخدمة العملاء ، واعمل نظام تقسيط مرتاح
وحط كمان فلوس العملاء فى البنك ، ومن أرباح فلوس العملاء
أبدأ اشتغل تاتا تاتا ، وساعتها حتكسب وتبقى من اكابر المستثمرين
وكل التكلفة منحصرة فى تمن الارض اللى فى الاصل بملاليم
وكده حتبقى رجل اعمال كبير يا معلم وابقى تعالى اعلن عندنا فى المدونة
وما تنساناش فى شقتين .
وحتى لو المشروع فشل حول فلوسك لسويسرا وكت يا man
وعيـــــش فى الروقـــــــــــان
مع تحياتى / حازم ربيع

هناك 18 تعليقًا:

promise is promise يقول...

السلام عليكم

اول تعليق اولا الفكره جميله فكرتنى ببوست كنت منزلاه عن ان مصر اوشكت تختفى لتعود الينا فى صوره صكوك واتخيلت لو ان الحكومه هتوزع علينا حقوقنا فى الصكوك دى هتعمل بحقك ايه
انا طبعا جاتلى نفس الفكره انى ابيع حقى واشترى بالفلوس ارض فى الصحراء وانت بقا كملتى الفكره
وبالنسبه للتسويق فده لعبتى اصلا لانى درساه بعنايه

تقبل مرورى وبشكر الاخ هانى على زيارته ليا
وشكرا ليك على الفكره الجامده دى
لك خالص تحياتى
والسلام ختام

على فكره اسم البوست ياوطن منين اشتريك لو تحب انك تشوفه

EMMY BABY يقول...

حلووووووة الفكرة جدا

بس اللى ينفذ بقى

مدونة ليها فكر جديد فعلا

ميرسى جدااا لزيارتكم لمدونتى

واتمنى التواصل الدائم

تحياتى

ايمى

صفــــاء يقول...

يا كبير انت وهو
الفكرة قديمه ودايبه
ومش بيمنعنا عنها غير بعيد عنك غباء الضمير ...
فكرة الاغانى دى نصيحه سودة
سايقه عليكم النبى ترحمونا من ترويجها أعصاب السمع عندنا باظت خلاص ومعدش فينا حد تانى يجعر فى ودانا

الفكرة الأجمل بقى هى شراكتكم فى المدونه الطايشه دى

تحياتى لكم

اقدم عاصمه فى الحب يقول...

ههههههههههههههههههههههههههههه
هههههههههههههههههههههههههههه
هههههههههههههههههههههههههه
يا راجل ....؟!
هههههههههههههههههههههههههههههه

قلم رصاص يقول...

ههههههههههههه

كل المصريين عارفين الفكرة دي على فكرة يعني

لكن المشكلة في التطبيق
لو تساعدهم ينوبك ثواب
ههههههههههه

موضوع جميل حقيقي

مزيد من التميز والابداع

في حفظ الله

غير معرف يقول...

ههههههههههههههههههه

افكار غير شكل

مدونتكم جميلة وهادفة

بالتوفيق يارب

(Joudy) يقول...

حلوة بجد فكرة هايلة لا وكمان عندك حلول لكل المشاكل حتى الهروب بجد ومن غير هزار المرة دى الموضوع بجد والمدونة كمان جميلة ورائعة وربنا يوفكم ان شاء الله

دمتم بكل الخير

بزنس تعيش يقول...

الى promise
-----------
بما انى صاحب فكرة الاستثمار الجديد
بتاعك
يبقى ليا نسبة
مستنى الكشات توصل على حسابنا
اوعى تنسي
-----------------------
مع تحياتى / حازم ربيع

بزنس تعيش يقول...

الى ايمى
-*-*-*-
بصى يا ايمى الافكار مرمية على الارصفة
بس فى ناس بتلتقط الفكرة
وتلمعها وبيكون عندها الاصرار
انها تنجحها
وفى ناس بتكتفى بالتصفيق
وتقول كلام جميل
واحنا فى اصحاب وبزنس
بنقولكم افكار
موجودة بالفعل وقابلة للتكرار
فياريت تنفذوا
--------------------------
نورتينا يا ايمى
واكيد هايكون فى تواصل دائم

------------------------------
مع تحياتنا / حازم وهانى

بزنس تعيش يقول...

الى صفاء
-*-*-*-
مش مهم ان الفكرة قديمة
المهم انها قابلة للتحقق
وعلى فكرة انا ولدى الله يرحمه كان عامل
شركة وكان بيشتغل فيها بما يرضى الله
واستفاد من الاستثمار العقارى
وافاد الناس
---------------------------
* حكاية الهروب بالفلوس دى
مجرد جزء فكاهى فى البوست
-------------------------
* اما عن ترويج فكرة الاغانى
فانا ما اوعدكيش اننا هنبطلها
لانها ممكن تكسب الشباب بجد
واحنا مدونة هادفة للربح لينا وللاخرين
-------------------------------
*فعلا اجمل حاجة شراكتنا فى المدونة
بس ياجماعة انا باشتكى لكم من هانى
مش شغال معايا خالص ومانتخ ومعتمد على
------------------------------
مع تحياتى / حازم ربيع

بزنس تعيش يقول...

الى اقدم عاصمة فى الحب
-*-*-*-*-*-*-*-*-*-*-
كويس اننا ضحكناك
وبالمناسبة
ماذا تقصد ب يا راجل؟
---------------------------
مع تحياتنا / حازم وهانى

بزنس تعيش يقول...

الى قلم رصاص
-*-*-*-*-*-*-
قريبا بعد الانتهاء من سلسلة ازاى تكسب من الهوا هانقدم سلسلة طبخة البزنس الى ها تقدم فى خطوات كيف تنجح فى تنفيذ الافكار
---------------------------
نورتنا يا احلى قلم بيكتب كلام فى الدنيا
-----------------------------
مع تحياتنا / حازم وهانى

بزنس تعيش يقول...

الى نوارة
-*-*-*-*-
نورتينا

ومرسيى لمجاملتك الرقيقة

وبنتمنى دوام التواصل التدوينى

-------------------------------
مع تحياتنا / حازم وهانى

بزنس تعيش يقول...

الى جودى
-*-*-*-*-

احلى حاجة ان الموضوع عجبك

ويارب افكارنا تنفعكم

----------------------------

مع تحياتنا / حازم وهانى

youssuf يقول...

هو من قاصرها و علي سويسرا علي طول ... بعد تحقيق النص الأول ...

انا مش بحبط حد علي فكرة استمروا و احنا في ظهركوا ...

شباب المستقبل يقول...

والله كلام جميل ومفيد وربنا يوفقوا وتمدونا بالمزيد انشاء الله
---------------------------
مع تحياتى/عبده

بزنس تعيش يقول...

الى يوسف
-*-*-*-*-

نورت مدوناتنا ويارب دايما تبقى فى ظهرنا

بس الجزء بتاع سويسرا دا جزء فكاهى
بس بردوا حل

افرض ان الاجراءات بوظت معاك والروتين خنقك

ها تعمل ايه تخرج بره البلد شوية
وفلوسك معاك

ساعتها البنوك ها تجرى وراك وتبوس ايدك

انك تسدد وبتيسرات

وكدة كدة هما مش ها يخسروا حاجة

لانهم بياخدوا فايده كبيرة جدا على القرض

بس مش معنى كدة انك تسرق وتطير

ربنا ما بيسبش
---------------------------
دائما ما يسعدنا مرورك
بمدونتنا المتواضعة
مع تحياتنا / حازم وهانى

بزنس تعيش يقول...

الى عبده
-*-*-*-*-
تسلم يا قمر

انت منورنا يا اخر عنقود المدونين

ويا تلميذنا النجيب

وباشكرك على الكلام الحلو اللى انت قلته عننا فى مدونتك

دائما الى الامام يا بطل
-------------------------------
مع تحياتنا / حازم وهانى